Hodiaŭ estas la 8-a de januaro, 2021. Jam pasis unu semajno de la jaro 2021. Laste mi sentas, ke la tempo flugas tiel rapide kiel birdo. Hieraŭ neĝis peze, tial mi restis hejme, plie hieraŭ ne estis leciono. Varmeta ĉambra aero sufiĉe ripozigas min. Legante librojn, spektante filmojn mi plene ĝuis unu tagon hejme. De tempo al tempo venas retleteroj de samideanoj kun freŝaj novaĵoj. S-ro Rob el Nederlando estas unu el miaj respektataj esperantistoj, kiu sendis leteron kun la titolo ‘Puraj Pulmoj’, kies temo estas tio, ke oni ne fumu por sia sano. Li estas sufiĉe maljuna tamen lia amo al homo kaj Esperanto neniom ŝanĝiĝis. Mi esperas, ke li vivos longe kun sano por si mem kaj por nia movado. Oni diras, ke ‘Horo estas oro’. Mi uzu la horon utile kaj valore. La malvarmego daŭras eĉ hodiaŭ.